Tu scinne,
Sciummo, sciummo, sciummo,
Da 'a muntagna...
Io scénno
Ca na malasciorte
Mm'accumpagna...
E ghiammo, ohé!
Ll'ammore è sciummo ca se perde a mare...
Tu cante:
- tòcche, tòcche, tòcche -
Spaccalegna:
"'a saccio, nun ce sta na vócca
Cchiù sanguégna...!"
E i' scénno, ohé!
Chi perde 'ammore va cercanno 'o mare...
Campana
Ca suone 'a copp'a stu cunvento,
Tu siente ch'ha fatto chella faccia 'e santa?
Ajére, 'mbracci'a me, nu svenimento...
Stasera vasa a n'ato e se n'avanta!
Oje comme
Sona lenta e triste
Na zampogna,
Ca scénne
Sciummo, sciummo, sciummo, -
Da 'a muntagna!...
E ghiammo, ohé!
Ll'ammore è sciummo ca se perde a mare...
E 'nfunn'ô mare s'arreposa 'o core...
Paese
Addó' só' nato, io te saluto...
Te veco llá 'ncimma, sulo e abbandunato...
E io 'nfamo, 'nfamo 'e me, mme ne só' ghiuto...
Te lasso pecché 'ammore mm'ha lassato!
Tu chiagne quase comm'a n'ommo
Ca se lagna...
E i' scénno
Sciummo, sciummo, sciummo, -
Da 'a muntagna!...
E ghiammo, ohé!
Ll'ammore è sciummo ca se perde a mare...
E sulo 'o mare fa scurdá ll'ammore...
A strong comment here is specific: the phrase you keep hearing, the mood you come back for, or the reason this song stays in rotation.
Sign in to post the first listener note. Reporting stays open to everyone.