I' m'arricordo 'e Napule

I' m'arricordo 'e Napule 'e matina,

quando schiarava juorno a ppoco, a ppoco,

'nu ventariello doce e 'n'aria fina,

spuntava 'o sole 'ncielo comme foco.

'A tutte 'e fronne cantevam aucielle

e salutava a tutt''e nenne belle,

e 'a 'nu guaglione 'm manech''e cammisa

senteva chesta voce 'e paraviso:

Rose, rose de maggio,

rose pe''nnammurate,

cu 'st'aria 'nbarzamata

vuje dint''o lietto state?

I' m'arricordo 'e Napule 'e cuntrore,

'o sole ca cuceva 'e sentimente,

'na coppia 'e nnammurate a 'na cert'ora

se deva a Margellina appuntamento.

E lu Vesuvio visto da luntano,

'o mare ca sbatteva chiano, chiano,

mentre de' scoglie respirav' addore,

senteva 'n'ata voce 'e cantatore:

I' tengo 'a nnammurata ch'è bella,

e sto geloso,

e tengo 'e persiane

apposta pe' dischiude.

I' m'arricordo 'e Napule 'e nuttata,

ncopp''a ll' onne, Pusilleco addurmeva,

e po' menava 'n'aria profumata,

comm' a ll'argiento 'a luna le spanneva.

E quanno 'e chillo cielo m'arricordo,

me vene all'uocchie 'e lagreme 'nu velo,

pare ca veco 'e stelle na curona

e sento ancora l'eco 'e 'sta canzona:

Oj varca lenta e stracqua,

i' penzo 'a nenna mia,

c''a voglio bene ancora,

e moro 'e gelusia.