Entwickligsschtuck

me gseht se nümm so viu ir schtadt

öppen am sunntig mau im tierpark

är schtosst dr wage - sie fuetteret d'büffle

& die chliini grännet & schiesst dr nuggi furt

är bückt sech & är gseht chli komisch us

villecht isch's dr teddybär i sim hosesack

är list dr nuggi uf & tuet ne dr chliine wieder ine

& die grännet & grännet & hört nümme uf

& jitze wird är ganz närvös

& laat dr chinderwage schtah

sie het erbarme - nimmt die chliini i d'arme

& die wird plötzlech schtiu & lachet ds mami a

sis schnäue outo het är immer no

& so schön wie's isch - es ligt jitz nümme dinn

& mit däm chindersitz isch's nume no haub so schpitz

sie findet's sowieso e witz & wett lieber no es ching

dür d'wuche schteit är hinder em gmüesregau

är schafft im lade wo sim schwager ghört

& dä kennt'r no vor schueu & het ne nid möge schmöcke

het ne nid emau beachtet & jitze isch es umgekehrt

aber är verchouft das gmües mit charme

är het geng e schpruch parat

är lachet mit de dame - kennt jedi bim name

da chunnt dr schwager us em lager

& si charme gheit i chopfsalat

es isch truurig - es isch wahr & me würd ne fasch nümm kenne

dr rebeu hingerem gschteu - hanspeter jitz bisch ne nümme