Merksch nid...?

Werum immer die schiss Schmärze zum inspiriert wärde?

Ych weiss jo, dass-y läb. Mi Kummer wird mit mir stärbe.

Ych seh oft z´früeh Schärbe, mein dass alles fertig isch,

drbyy merk-y nid, dass´ zwüsche uns no sehr viel git.

Es isch nid nur die gmeinsam Zyt, es isch viel meh

doch in mitte vo däm Stress, dörfe mr uns nid als Ventil gseh.

Mir händ's beidi nid immer eifach, sind beidi au mol reizbar,

gän beidi unser Teil dra und drum packe mr´s gmeinsam.

Ych ha Angst dich z´verliere, drum han-y au Angst mich z´verliebe

doch es Änd ka mi im Momänt no lang nid betriebe.

D´Hoffnig stirbt z´letscht, ych weiss dass mr nonig uffgän,

au wenn's nid immer klappt mit uns und mr zämme Puff hän.

Ych dänk am Änd, könne mr gmeinsam drüber lache.

Kumm loss uns Gras drüber wachse. Numme eimol übernachte.

Doch au im Traum begegne ych dir, ych sehn mich nach dir,

aber bi mit dr Närve am Änd nach däm ewige Krieg.

Merksch nid, dass ych mehr will? Ych bi ehrlich: du bisch s´Derbsti.

Das Gerangel und die Debatte mache mi fertig.

Ych ha so viel Liebi, doch keini will sie.

Ka drüber schryybe und rappe, doch eigentlich killts mi.

Ych ligg elei im Bett obwohl´s Platz für beidi hett

und überleg was du mir geh hesch, wo sunscht keini hett.

Trotz verschiedene Meinige sin mr doch eins gsi:

Ych dini Schultere zum aalähne, du mis Meitli.

Die einzig, wo mich tag täglich zum grinse bringt

und mr s´Gfühl git nid am Rand vom Läbe z´stoh, sondern mittedrinn.

Unvermittled bringsch du mich in neui Sphäre,

eröffnisch unbekannti Wälte, wo ohni dich nid so wäre.

Während ych probier z´erkläre wie Hip Hop funktioniert,

wie mr richtig Outlines zieht, ohni dass mr Kunst kopiert.

Ych gib alles uf Wunsch vo mir, wie idiotisch.

Ych hätt scho immer sötte wüsse, dass du wieder gohsch, Bitch.

Doch zum Glück han-y gmerkt, wie sich alles im Kreis dreiht,

gmerkt wie du kopfnicksch und eigentlich nei meinsch.

Doch s´isch leider tragische Fakt, dass fascht gar nütt me klappt

ych ha das Klagelied satt, mach´s guet und blyyb stark.

Denn du hesch z´viel Problem und kasch mr z´wenig geh.

Ych ha viel Kollege, won-y z´wenig gseh.

Ojemineh, bitte brich jetzt nid in Träne uss.

Du hesch mich verloh, ych stand jetzt im Stägehuus.

Refrain

Frog mi nid werum, aber du bisch mr grad ebe in Sinn ko

und ych gseh wieder Bilder wil im Momänt nid viel goht.

Stimmt scho, es isch e gueti Zyt gsi,

doch es blyybt e bittere Noochgschmack wie Wysswyy.

Knackig wie Biscuit hesch mich um dr Verstand brocht

und mich fascht in Wahnsinn triebe wie dr Van Gogh.

Für dich wär-y d´Wand hoch, hättsch gseit dass öppis nid stimmt,

gseit was nid willsch, damit y no öppis mitnimm

wenn's verbyy isch, usser ernüchterndi Yysicht,

dr Wuet im Buuch und dr Erinnerig an di Gsicht.

Ha mi benoh wie e Klyykind, doch kei Träne isch mr pyynlich

wil jedi vo mir isch, Truur wyycht Erlyychtrig.

Und es wär nid ych gsi, wenn ych nid so reagiert hätt

was y drmit unterstryych, dass ych do das Lied rap.

Ych weiss, eigentlich hätt ych e grössere Wortschatz,

doch im Momänt länge zwei Wörter: love sucks!

Refrain