Vogelnest

An am Sonntag i woass no wie heut´.

da hat mi´s Spazierengeh´n g´freut,

und weil ma halt nix a so g´foit,

drum bin i glei aussa in Wald.

Auf oamoi i geh no net lang,

da hör i an wunderschön´ G´sang,

aha denk i mir und schaug nauf,

auf´m Baum war a Vogelnest drauf.

I denk mir do kraxelst jetzt nauf,

und nimmst dir des Vogelnest aus,

des Kraxeln war gar net schwar,

aber wia i nauf kimm war´s Vogelnest laar.

Und wie i am Baum drob´n sitz,

vom Kraxln no fürchterlich schwitz,

do kimmt a Lieb´spaar versunken im Traum,

und hockt si grad unter mein Baum.

Ja i auf mein Baum bin ganz still,

möcht sehn was der Liebhaber will,

er sagt i hob di so gern,

du sollst mei Weiberl bald werd´n.

Er nimmt sie ganz zart bei der Hand,

und sagt ihr ins Ohr allerhand,

sie sagt ja i hätt di scho gern,

aber wer soll uns´re Kinder ernähr´n.

Ich bin ein katholischer Christ-ist,

und du von dem selb´n Glauben bist,

vertrau nur da drob´n auf den Herrn,

der werd scho die Kinder ernähr´n.

Da schrei i glei obi vom Baum,

Bagage jetzt schleichts euch fein hoam,

wann i obi kumm zeig i euch den Herrn,

der euch tuat die Kinder ernähr´n.

Dia zwoa warn vor Schreck´n ganz blass,

ham g´moant dass der Herrgott scho woass,

no san´s grennt über Stock über Strauch,

i hob g´haltn vor Lacha mein Bauch.